Líkaminn er skál

Rauði þráður sýningarinnar Líkaminn er skál er endurtekningin og kerfin sem eru allt í kringum okkur og inni í okkur. Hjartslátturinn, öndunin, frumurnar, takturinn í deginum, takturinn í náttúrunni, að við vöknum, burstum tennurnar og fáum okkur kaffi. Sýningin byggir á tilfinningunni sem kemur í kjölfar þess að takturinn í þessum kerfum fer úr jafnvægi. Þetta getur verið þegar við missum ástvin, heilsuna eða  eldgos brýst upp í bakgarðinum. Eitthvað gerist sem kippir jörðinni undan fótum okkar og breytir öllu sem á eftir kemur. Allt sem okkur hefur fundist gefið er ekki eins og það var. Sumarið kemur ekki lengur á eftir vorinu. Frumur líkamans missa taktinn og fara á yfirsnúning. Að vera á lífi er skyndilega ekki sjálfgefið. Allt í einu er áþreifanlegt hvernig eitt andartak getur breytt öllu. En mitt í þessari óvissu og óreiðu fæðist eitthvað alveg nýtt. 

LÍFIÐ - drullumall

Lífið er stórskemmtilegt drullumall á mörkum leikhúss og myndlistar fyrir alla fjölskylduna sem fjallar um sköpunarkraft, vináttu og hringrás lífsins, þar sem unnið er með mold.

Sýningin hefur hlotið einróma lof áhorfenda sem og gagnrýnenda jafnt á Íslandi sem erlendis. Verkið hefur m.a. verið sýnt í Kína, Japan, Þýskalandi, Hollandi, Noregi, Möltu og Svartfjallalandi. 

LÍFIÐ - hlaut leiklistarverðlaunin GRÍMUNA sem besta barnasýning ársins 2015 auk þess sem leikhúsið 10 Fingur  var valið Spoti ársins 2015.

Inasand ...

Gagnvirkt þátttökuverk fyrir alla fjölskylduna. Upplifun sem virkjar skilningarvitin og ævintýrið í kyrrðinni.

Hljóðmynd verksins leiðir áhorfendur dýpra inní líkamann og tengingu við náttúruna.

Verkið virkar á mörgum sviðum í gegnum, heyrn, sjón, snertingu og djúpa líkamlega skynjun. Áhorfendum er boðið að upplifa á eigin forsendum og mynda eigin tengsl. Þátttakendur ákveða hvernig þeir takast á við verkið, hvort þeir leika sér með sandinn, horfa á myndbandið eða hina þátttakendurna sem leika sér í sandinum og verða einskonar flytjendur í verkinu.

Stúlkan sem stöðvaði heiminn

​Töfrandi saga og ævintýraleg upplifun!

Getur orðið til töfrandi ævintýraheimur úr ruslinu sem við hendum? Endurvinnsla, undirvitund, umbreyting.......

Í verkinu er skapaður ímyndaður heimur þar sem tekið er á áskorunum samtímans á ævintýralegan hátt. Umhverfismál fléttast  saman við líðan stúlkunnar sem upplifir kvíða og áhyggjur vegna þeirra breytinga sem eru að verða á hennar daglega lífi en um leið líðan hennar, tilfinningum og jörðinni allri.​ Sýningin var frumsýnd í Borgarleikhúsinu 2021.

​

Skrímslið litla systir mín

Saga af strák sem ferðast gegnum skuggalega skóga, um dimmar drekaslóðir, alla leið út á heimsenda og lærir í leiðinni að elska litlu systur sína.

Leikhúsupplifun fyrir börn í hæsta gæðaflokki þar sem börnin taka þátt og upplifa í miklu návígi töfra leikhússins og myndlistarinnar.

Sýningin hlaut leiklistarverðlaunin GRÍMUNA sem besta barnasýning ársins 2012.

Bókin Skrímslið litla systir mín kom út árið 2014 ásamt hljóðdiski með tónlist Eivarar Pálsdóttur. 

Birnirnir þrír

Tónleikar með

Sinfóníuhljómsveit Íslands

Verkið Birnirnir þrír eftir tónskáldið Eric Coates segir hina sígildu sögu af stúlkunni Gullbrá sem vaknar snemma morguns og fær sér lystigöngu í skóginum. 

Sagan hentar einstaklega vel sem myndrænn stuðningur við tónlistarflutning þar sem flestir þekkja þessa sögu og það gerir verkið svo aðgengilegt fyrir áheyrendur. 

Verkið var flutt af Sinfóníuhljómsveit Íslands í Eldborgarsal Hörpu 2017